ಬೆಂಗಳೂರು: ಅಭಿನಯ ಶಾರದೆ ಎಂದೇ ಕರೆಯಲ್ಪಡುವ ಜಯಂತಿ ದಕ್ಷಿಣ ಭಾರತ ಚಿತ್ರರಂಗದ ಮೇರು ನಟಿ ಜಯಂತಿ(76) ಅನಾರೋಗ್ಯದಿಂದ ಬೆಂಗಳೂರಿನಲ್ಲಿ ನಿಧನರಾಗಿದ್ದಾರೆ. ಕನ್ನಡ, ತೆಲಗು, ತಮಿಳು, ಮಲಯಾಳಂ, ಹಿಂದಿ ಮತ್ತು ಮರಾಠಿ ಭಾಷೆಗಳ ಚಿತ್ರಗಳಲ್ಲಿ ಅಭಿನಯಿಸಿ ಪಂಚತಾರಾ ನಟಿಯೆಂಬ ಬಿರುದನ್ನೂ ಹೊಂದಿದ್ದ ಜಯಂತಿ ಸುಮಾರು 500 ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದರು. ಕನ್ನಡದಲ್ಲಿ ಅಣ್ಣಾವ್ರ ಜೊತೆ ಜಯಂತಿ ನಲ್ವತ್ತಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಾಯಕಿಯಾಗಿ ನಟಿಸಿದ್ದಾರೆ.
ಬಳ್ಳಾರಿಯಲ್ಲಿ 1950 ರಲ್ಲಿ ಜನಿಸಿದ ಜಯಂತಿ ಅವರ ಬಾಲ್ಯದ ಹೆಸರು ಕಮಲಾ ಕುಮಾರಿ. ತಂದೆ ಬಾಲಸುಬ್ರಹ್ಮಣ್ಯಂ ಬೆಂಗಳೂರಿನ ಸೇಂಟ್ ಜೋಸೆಫ್ ಕಾಲೇಜಿನಲ್ಲಿ ಇಂಗ್ಲಿಷ್ ಪ್ರಾಧ್ಯಪಕರಾಗಿದ್ದರು. ತಾಯಿ ಸಂತಾನಲಕ್ಷ್ಮೀ ಗೃಹಿಣಿ. ಮನೆಯಲ್ಲಿ ಮೊದಲನೆಯ ಮಗಳಾಗಿ ಹುಟ್ಟಿದ ಜಯಂತಿಗೆ ಇಬ್ಬರು ತಮ್ಮಂದಿರು.
ಜಯಂತಿಯ ತಾಯಿಯವರಿಗೆ ಇವರನ್ನು ಶಾಸ್ತ್ರೀಯ ನೃತ್ಯಗಾರ್ತಿಯನ್ನಾಗಿ ಮಾಡಬೇಕೆಂಬ ಬಯಕೆ ಇದ್ದುದ್ದರಿಂದ ಚಂದ್ರಕಲಾರವರ ನೃತ್ಯಶಾಲೆಗೆ ಸೇರಿಸಿದರು. ಇಲ್ಲಿ ಜಯಂತಿಯವರ ಸಹಪಾಠಿಯಾಗಿದ್ದ ಮನೋರಮಾರವರು ಮುಂದೆ ಪ್ರಖ್ಯಾತ ತಮಿಳು ನಟಿಯಾದರು. ಕನ್ನಡ ನಿರ್ದೇಶಕ ವೈ.ಆರ್.ಪುಟ್ಟಸ್ವಾಮಿಯವರು ಒಂದು ನೃತ್ಯಾಭ್ಯಾಸದಲ್ಲಿ ಕಮಲಾಲುಮಾರಿಯವರನ್ನು ನೋಡಿ ತಮ್ಮ `ಜೇನು ಗೂಡು’ ಚಿತ್ರದಲ್ಲಿ ನಟಿಸುವ ಅವಕಾಶ ಕೊಟ್ಟರು. ಆ ಚಿತ್ರದಿಂದ ಜಯಂತಿಯವರ ಬಣ್ಣದಲೋಕಿನ ಪಯಣ ಶುರುವಾಯ್ತು. ಜಯಂತಿ ಎಂಬ ತೆರೆಯ ಮೇಲಿನ ಹೆಸರಿನ ನಾಮಕರಣ ಮಾಡಿದ್ದು ಕೂಡ ಪುಟ್ಟಸ್ವಾಮಿಯವರೇ. ಅಲ್ಲಿಂದ ಶುರುವಾದ ಜಯಂತಿಯವರ ಸಿನಿ ಪಯಣದಿಂದ ದೇಶಾದ್ಯಂತ ಲಕ್ಷಾಂತರ ಅಭಿಮಾನಿಗಳ ಪ್ರೀತಿಯನ್ನು ಸಂಪಾದಿಸಿದರು. ಜಯಂತಿಯವರ ಇಲ್ಲದಿರುವಿಕೆ ಸ್ಯಾಂಡಲ್ ವುಡ್ಡಿಗೆ ಒಂದು ದೊಡ್ಡ ಆಘಾತವೆಂಬುದಂತೂ ನಿಜ. ಕನ್ನಡದ ಈ ಮಣ್ಣಿನಲ್ಲಿ ಅಭಿನಯಶಾರದೆ ಮತ್ತೆ ಹುಟ್ಟಿಬರಲಿ, ಆ ಕಲಾದೇವಿಯ ಸೇವೆ ಮಾಡಲಿ ಎಂಬುದೇ ಚಿತ್ರೋದ್ಯಮದ ಪ್ರಾರ್ಥನೆ.
