ನಿರ್ದೇಶಕ ಎಸ್ವಿ ರಾಜೇಂದ್ರ ಸಿಂಗ್ ಬಾಬು ಅವರ ತಾಯಿ ಹಿರಿಯ ಕಲಾವಿದೆ ಪ್ರತಿಮಾ ದೇವಿ ಬೆಂಗಳೂರಿನ ಮನೆಯಲ್ಲಿ ನಿಧನರಾಗಿದ್ದಾರೆ. ಅವರಿಗೆ ೮೮ ವರ್ಷ ವಯಸ್ಸಾಗಿತ್ತು. ಅವರ ಅಂತ್ಯ ಸಂಸ್ಕಾರ ನಾಳೆ ಮೈಸೂರಿನಲ್ಲಿ ನಡೆಯಲಿದೆ.
ಪ್ರತಿಮಾ ದೇವಿಯವರು ಮೂಲತಃ ಉಡುಪಿಯವರಾಗಿದ್ದು, ಇವರ ಬಾಲ್ಯದ ಹೆಸರು ಮೋಹಿನಿ. ಚಿಕ್ಕಂದಿನಿಂದಲೂ ಇವರಿಗೆ ರಂಗಭೂಮಿಯಲ್ಲಿ ಆಸಕ್ತಿ. ಭಾರತಕ್ಕೆ ಸ್ವಾತಂತ್ರ್ಯ ಬಂದ ವರ್ಷ 1947 ರಲ್ಲೇ ಇವರ ಸಿನಿಮಾ ರಂಗ ಪ್ರವೇಶವಾಯ್ತು. ಸಿ.ವಿ.ರಾಜು ನಿರ್ದೇಶನದ ಕೃಷ್ಣಲೀಲಾ ಇವರು ಅಭಿನಯಿಸಿದ ಮೊದಲ ಸಿನಿಮಾ. ಸಂಪೂರ್ಣ ಪ್ರಮಾಣದ ನಾಯಕಿಯಾಡಿ ಅಭಿನಯಿಸಿದ ಮೊದಲ ಚಿತ್ರ 1951 ರಲ್ಲಿ ತೆರೆಕಂಡ ಶಂಕರ್ ಸಿಂಗ್ ನಿರ್ದೇಶನದ – ಜಗನ್ಮೋಹಿನಿ. ನಾರದ ವಿಜಯ, ವರದಕ್ಷಿಣೆ, ಮುಟ್ಟಿದ್ದೆಲ್ಲಾ ಚಿನ್ನ, ಭಕ್ತಚೇತ ಸೇರಿದಂತೆ ಸುಮಾರು 60 ಚಿತ್ರಗಳಲ್ಲಿ ಅವರು ಅಭಿನಯಿಸಿದ್ದರು. ವಿಷ್ಣುವರ್ಧನ್ ಅಭಿನಯದ ನಾಗರಹಾವು, ಕಮಲ್ ಹಾಸನ್ ರಮೇಶ್ ಅರವಿಂದ್ ಅಭಿನಯದ ರಾಮ ಶಾಮ ಭಾಮ ದಲ್ಲಿ ಕೂಡ ಇವರು ಅಭಿನಯಿಸಿದ್ದರು.
ಕಲಾವಿದರಿಗೆ ಎಂದಿಗೂ ಸಾವಿಲ್ಲ ಎಂಬ ಮಾತಿದೆ. ಹೌದು. ಭೌತಿಕವಾಗಿ ಅವರು ನಮ್ಮಿಂದ ದೂರವಾದರೂ, ಅವರ ಪಾತ್ರಗಳ ಮೂಲಕ ನಮ್ಮ ನೆಡುವೆಯೇ ಎಂದೂ ಇರುತ್ತಾರೆ. ಇವರು ಅಭಿನಯಿಸಿದ ಚಿತ್ರಗಳು, ನಾಟಕಗಳು, ಪಾತ್ರಗಳು ಎಂದೆಂದೂ ನಮ್ಮ ಮನದಲ್ಲಿ ಹಸಿರಾಗಿರಲಿ. ಇವರ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಆ ಭಗವಂತನಲ್ಲಿ ಚಿತ್ರೋದ್ಯಮ.ಕಾಂ ನ ಪ್ರಾರ್ಥನೆ.
