ನಾನೇ ಬಾಳಿನ ಜೋಕರ್. ನಾನೇ ಬಡವರ ಮೆಂಬರ್. ಕರೆಯೋ ಹೆಸರೋ ಭಲೇರಾಜ ನಾಳೆ ಊಟಕೆ ಚಕ್ಕರ್ ಎನ್ನುತ್ತಾ ಪಿಬಿಎಸ್ ದನಿಯಲ್ಲಿ ಹಾಡುತ್ತಾರೆ ರಾಜ್. ಟಿ ಶರ್ಟ್, ಒಂದು ಕಾಲು ಮಡಿಚಿರುವ ಪ್ಯಾಂಟ್, ತಲೆ ಮೇಲೆ ಟೋಪಿ. ಅದಕ್ಕೆ ಪುಕ್ಕಗಳು. ಹಿಂದೆ ಪಿಕ್ ಪಾಕೆಟ್. ಈಗ ರಾಬ್ ಪೀಟರ್ ಪೇ ಪೌಲ್ ಸ್ವಭಾವ. ಒಂದು ದಿನ ಒಬ್ಬ ಯುವತಿಯ ಪರ್ಸ್ ಮೂವರು ಕಳ್ಳರು ಕದಿಯುತ್ತಾರೆ. ತಗೋಳ್ಳಿ ಫೈಟಿಂಗು. ಕೊನೆಗೆ ಪರ್ಸ್ ತೆಗೆದು ನೋಡಿದರೆ ಆ ಯುವತಿಯ ಪರ್ಸಿನಲ್ಲಿ ರಾಜ್ ಮತ್ತು ಆ ಯುವತಿ (ಬಿವಿರಾಧ) ಪಟ ಇರುತ್ತೆ. ಅವರಿಬ್ಬರೂ ಅಣ್ಣ ತಂಗಿ!
ಚಿಕ್ಕಂದಿನಲ್ಲಿ ಅಮ್ಮನ (ಜಯಶ್ರೀ) ಜೊತೆ ರೈಲಿನಲ್ಲಿ ಹೋಗುವಾಗ ಅಪಘಾತ ಆಗಿ ಬೇರೆ ಆಗಿರುತ್ತಾರೆ. ಅದೇ ಡಬ್ಬಿಯಲ್ಲಿದ್ದ ತಾಯಿಯಿಲ್ಲದ ತಬ್ಬಲಿ ಮಗನಿಗೆ (ರಂಗ) ಶ್ರೀಮಂತ ತಾಯಿ ಆಗುತ್ತಾಳೆ ಜಯಶ್ರೀ. ಇತ್ತ ಹಸಿವಿನಿಂದ ಕಂಗೆಟ್ಟ ಮಕ್ಕಳಿಗೆ ಯಾರೂ ಇಲ್ಲದ ಕೆ ಎಸ್ ಅಶ್ವತ್ಥ್ ಆಶ್ರಯ ನೀಡುತ್ತಾರೆ. ನದಿಯಲ್ಲಿ ಹುಡುಗನೊಬ್ಬನನ್ನು ತಳ್ಳಿದ ರಾಜ ಆ ಹುಡುಗ ಸತ್ತನೆಂದು ತಿಳಿದು ಮನೆಯಿಂದ ಓಡಿ ಹೋಗುತ್ತಾನೆ. ತಂಗಿ ಪುಷ್ಪಲತಾ ಅಲ್ಲೇ ಬೆಳೆಯುತ್ತಾಳೆ. ಅವರು ಊರು ಬಿಡುವುದರಿಂದ ರಾಜನಿಗೆ ತಂಗಿ ಎಲ್ಲೆಂದು ತಿಳಿಯುವುದಿಲ್ಲ.
ಫಾಸ್ಟ್ ಫಾರ್ವರ್ಡ್… ರಾಜನ ಮನೆಗೆ ಅಯಾಚಿತವಾಗಿ ರಾಣಿ (ಜಯಂತಿ) ಬರುತ್ತಾಳೆ. ಅವಳು ಸಿ.ಐ.ಡಿ. ಎಂದು ನಮಗೆ ತಿಳಿಯುವ ಅನೇಕ ಸಂದರ್ಭಗಳಿವೆ. ಬೀದಿಯಲ್ಲಿ ಕುಣಿಯುತ್ತಾಳೆ, ರಾಜನ ಮನೆ ಸೇರಿ ಅವನನ್ನು ಗೋಳು ಹುಯ್ದುಕೊಳ್ಳುತ್ತಾಳೆ. ಹೇಗೋ ರಂಗನ ಡ್ರೈವರ್ ಕೆಲಸ ಗಿಟ್ಟಿಸಿದ ರಾಜ ಯಾವಾಗಲೋ ತಂಗಿಗೆ ತಾನೇ ಅಣ್ಣ ಎಂದು ಬಾಯಿ ಬಿಡುತ್ತಾನೆ.
ರಂಗನಿಗೂ ಲತಾಗೂ ಮದುವೆ ಆಗುತ್ತದೆ. ಹಲಂ ರಂಗನನ್ನು ಬಲೆಗೆ ಹಾಕಿಕೊಂಡು ಅವನಿಂದ ಕಳ್ಳ ಸಾಗಾಣಿಕೆ ಮಾಡಿಸುತ್ತಾಳೆ.
ನಾಗಪ್ಪ, ಎಂ.ಪಿ.ಶಂಕರ್ ಕಳ್ಳರು.
ಕೊನೆಗೆ ಎಲ್ಲವೂ ಶುಭಂ.
ನಾನೇ ಬಾಳಿನ ಜೋಕರ್ ಒಂದೇ ನನಗೆ ನೆನಪಿದ್ದ ಹಾಡು.
