ಮಧುಮಾಲತಿ

ಉಜ್ಜಯಿನಿಯಲ್ಲಿ ವರ್ತಕ ಕೇಶವಚಂದ್ರ (ಕೆ.ಎಸ್.ಅಶ್ವತ್ಥ್) ಮತ್ತು ಗಜಲಕ್ಷ್ಮಿ (ಜಯಶ್ರೀ) ಇವರ ಪುತ್ರ ಮಾಧವಚಂದ್ರ (ರಂಗ) ಮತ್ತು ಮಗಳು ಮಧುಮಾಲತಿ (ಬೆಡಗಿನ ನಟಿ ಭಾರತಿ). 

ಒಬ್ಬ ತಾಂತ್ರಿಕ ಹದಿನೈದು ಶೋಡಷಿಯರನ್ನು ಬಂಧಿಸಿಟ್ಟು ಹದಿನಾರನೇ ಶೋಡಷಿಯಾಗಿ ಮಧುಮಾಲತಿಯನ್ನು ಆರಿಸಿಕೊಳ್ಳುತ್ತದೆ. ಅವರನ್ನು ಕೊಂದು ದೊಡ್ಡ ಮಾಂತ್ರಿಕ ಆಗಬಹುದೆಂಬ ನಂಬಿಕೆ ಅವನದು.

ಅದಕ್ಕಾಗಿ ವರ್ತಕನ ಮನೆಗೆ ಕಪಟಿ ಸಾಧುವಿನಂತೆ ಬರುತ್ತಾನೆ ಆ ತಾಂತ್ರಿಕ. (ಎಂ.ಪಿ.ಶಂಕರ್) 

ವರ್ತಕ ಮತ್ತು ಅವನ ಹೆಂಡತಿ ಆ ಸಾಧುವನ್ನು ನಂಬುತ್ತಾರೆ. 

ಇದಕ್ಕೆ ಮುಂಚೆ ತಾಂತ್ರಿಕನ ಶಿಷ್ಯ ಪ್ರಚಂಡ ಎನ್ನುವವನು, ಮಧುಮಾಲತಿಯನ್ನು ಮೂರು ಬಾರಿ ಕದ್ದೊಯ್ಯಲು ಪ್ರಯತ್ನಿಸಿರುತ್ತಾನೆ. ಮೊದಲ ಸಲ ಅವಳ ತಂದೆಯ ಸಮ್ಮುಖದಲ್ಲಿ ಜ್ಯೋತಿಷಿ ಮಧುಸೂದನ (ಹರಿಕಥಾ ಪಟು ಗುರುರಾಜುಲು ನಾಯ್ಡು ಉರ್ಫ್ ಅರುಣ್ ಕುಮಾರ್) ಅವಳನ್ನು ರಕ್ಷಿಸುತ್ತಾನೆ. ಎರಡನೆಯ ಸಲ ಮಾಂತ್ರಿಕ ವಾಮನ (ಉದಯಕುಮಾರ್) ಅವಳ ತಾಯಿಯ ಎದುರಿಗೆ ಕಾಪಾಡುತ್ತಾನೆ. ಮೂರನೆಯ ಸಲ ತ್ರಿವಿಕ್ರಮ (ರಾಜ್‍ಕುಮಾರ್) ಅವಳ ಅಣ್ಣನ ಸಮ್ಮುಖದಲ್ಲಿ ರಕ್ಷಣೆ ನೀಡುತ್ತಾನೆ.

ಈ ಮೂವರೂ ಅವಳಲ್ಲಿ ಅನುರಕ್ತರಾಗುತ್ತಾರೆ. ಈಗ ಅವರಲ್ಲಿ ಪರೀಕ್ಷೆ ಇಡುತ್ತಾನೆ ಕಪಟಿ ಸಾಧು. ಅದರಲ್ಲಿ ಮೂವರೂ ಜಯಿಸುತ್ತಾರೆ.

ಆದರೆ ಅಂದೇ ರಾತ್ರಿ ಸಂಮ್ಮೋಹನ ಶಕ್ತಿಯಿಂದ ಮಧುಮಾಲತಿಯನ್ನು ತನ್ನ ಗುಹೆಗೆ ಒಯ್ಯುತ್ತಾನೆ ಕಪಟಿ ಸಾಧು ಉರ್ಫ್ ತಾಂತ್ರಿಕ.

ಮೂವರೂ ಅವಳನ್ನು ಬಿಡಿಸಿಕೊಂಡು ಬರಲು ಹೋಗಿ ನಾನಾ ತಂಟೆಗಳಿಗೆ ಸಿಲುಕುತ್ತಾರೆ. ತಾಂತ್ರಿಕ ಸಾಯುವಾಗ ತನ್ನ ಶಿಷ್ಯ ಪ್ರಚಂಡನನ್ನು ಹಾವಾಗಿ ಮಾಡಿ ಅವರನ್ನು ಸಾಯಿಸಲು ಕಳಿಸಿದಾಗ, ಮಧುಮಾಲತಿ ಆ ಹಾವು ಕಚ್ಚಿ ಸಾಯುತ್ತಾಳೆ.

ಒಬ್ಬ ಅವಳನ್ನು ಬದುಕಿಸಲು ಪ್ರಯತ್ನ ಮಾಡುತ್ತಾನೆ. ಮತ್ತೊಬ್ಬ ಅವಳ ಬೂದಿಯನ್ನು ನದಿಯಲ್ಲಿ ಕದಡಲು ನೋಡುತ್ತಾನೆ. ಮೂರನೆಯವನು ತಾನೂ ಅವಳ ಬೂದಿಯನ್ನು ಜೊತೆಯಲ್ಲಿಟ್ಟುಕೊಂಡು ಸಾಯಲು ನೋಡುತ್ತಾನೆ.

ಮರಳಿ ಬದುಕಿದ ಮಧುಮಾಲತಿ ಯಾರನ್ನು ವರಿಸಬೇಕೆಂಬುದನ್ನು ರಾಜಾ ವಿಕ್ರಮಾದಿತ್ಯ (ಆರ್. ನಾಗೇಂದ್ರರಾವ್) ನಿರ್ಧರಿಸುತ್ತಾನೆ.

ಚಂದಮಾಮಾ ಶೈಲಿಯ ಈ ಕಥೆಯಲ್ಲಿ ಮಧುಮಾಲತಿಯಾಗಿ ನಟಿಸಿರುವ ನಟಿ ಭಾರತಿಯ ಬೆಡಗು, ಬಿನ್ನಾಣ, ಒನಪು, ವಯ್ಯಾರ… ಆಹಾ… ಅತಿ ಚೆಂದ.

ರಾಜ್‍ಕುಮಾರ್ ಎಂದಿನ ತಮ್ಮ ಪ್ರೇಮ, ತುಂಟತನ, ವಿರಹ, ವೀರ ರಸಗಳ ಪ್ರದರ್ಶನ ಮಾಡಿದ್ದಾರೆ. ಉದಯಕುಮಾರ್ ಮತ್ತು ಅರುಣ್‍ಕುಮಾರ್ ಕೂಡ ಮನಸ್ಸನ್ನು ತಣಿಸುವ ಅಭಿನಯ ನೀಡಿದ್ದಾರೆ. 1966ರ ಈ ಚಿತ್ರವು ಬಲು ಸುಂದರ ಗೀತೆಗಳನ್ನು ಹೊಂದಿದೆ.

ಎಸ್.ಜಾನಕಿ, ಬೆಂಗಳೂರು ಲತಾ ಹಾಡಿರುವ ‘ಅಂಜಿಕೆ ನಾಚಿಕೆ ಯೇತಕೆ ನೀ ನೀಗು ನೀಗು’, ಎಸ್ ಜಾನಕಿ ಅವರ ‘ಯಾರೋ ಏನೋ ಬಲ್ಲವರಾರು, ಅವರೇ ಅವರು ಅವರು…’ಎಸ್‍ಜಾನಕಿ, ಬೆಂಗಳೂರು ಲತಾ ಹಾಡಿರುವ ‘ಈ ಭಾವ ಈ ಭಂಗಿ ನಿನಗಾಗಿ ನಿನ್ನ ಹಿತಕಾಗಿ’, ಪಿಬಿಎಸ್ ಹಾಡಿರುವ ಪ್ಯಾಥೋಸ್  ಗೀತೆ ‘ಪ್ರಿಯತಮೆ ಮಧುಮಯೀ ಮಧುಮಾಲತಿ'(ಇದು ಅಣ್ಣಾವ್ರಿಗೆ).

ಜಿ.ಕೆ. ವೆಂಕಟೇಶ್ ರಾಷ್ಟ್ರಕವಿ ಕುವೆಂಪು ಅವರ ‘ಶೋಡಷೀ ಶೋಡಷೀ ಮೂಡಿಬಾ ಶೋಡಷಿ'(ಪಿಬಿಎಸ್ ಮತ್ತು ಟಿ.ಎ. ಮೋತಿ) ಮತ್ತು ‘ಶೋಡಷ ಚೈತ್ರದ ಸುಂದರಿ ನೀನು’ (ಪಿಬಿಎಸ್ – ಅಣ್ಣಾವ್ರಿಗೆ) ಗೀತೆಗಳನ್ನು ಬಳಸಿಕೊಂಡಿದ್ದಾರೆ.

ಚಂದಮಾಮಾ ಶೈಲಿಯ ಕಥೆಯನ್ನು ಇಷ್ಟು ಪರಿಣಾಮಕಾರಿಯಾಗಿ ಚಿತ್ರಿಸಿರುವುದನ್ನು ಕಂಡು ಮುದವೆನಿಸಿತು. ಎಂ.ಪಿ. ಶಂಕರ್ ವಿಲನ್ ಆಗಿರುವಾಗ ಅವರ ವಿಕಟಾಟ್ಟಹಾಸ ಕೇಳಲು ಬಹಳ ಖುಷಿ ಆಗುತ್ತದೆ. ‘ನಾಗರಹಾವು’ ಪೈಲ್ವಾನರಾಗಿದ್ದಾಗ ‘ಗೌರವ ಅಲ್ಲ ಮೇಷ್ಟ್ರೇ… ಭಯ’ ಎಂದು ನಗುವುದನ್ನೂ ಒಮ್ಮೆ ನೆನೆಯಿರಿ. ಬೂತಯ್ಯನಾಗಿ ಮಗ ಅಯ್ಯುವಿಗೆ ‘ಈ ಜನರನ್ನ ನಂಬೇಡ ನಂಬೇಡ’ ಎಂದು ಹೇಳುವುದನ್ನೂ ಒಮ್ಮೆ ಜ್ಞಾಪಿಸಿಕೊಳ್ಳಿ!

ಲೇಖಕರು: ಯತಿರಾಜ್ ವೀರಾಂಬುಧಿ