ತುಟಿಯ ಮೇಲೇ ತುಂಟ ಕಿರುನಗೆ ಕೆನ್ನೆ ತುಂಬಾ ಕೆಂಡ ಸಂಪಿಗೆ… ಈ ಪದಗುಚ್ಛವನ್ನು ಓದಿದೊಡನೆ ಈ ಮಧುರ ಹಾಡು ನಮ್ಮ ಮನದಲ್ಲಿ ಧುತ್ತೆಂದು ಪ್ರತ್ಯಕ್ಷವಾಗುತ್ತದೆ.
ಆದರೆ ಈ ಚಿತ್ರದಲ್ಲಿ ಟೈಟಲ್ ಕಾರ್ಡಿನಲ್ಲೇ ರಾಷ್ಟ್ರಕವಿ ಕುವೆಂಪು ಅವರ ಜೈ ಭಾರತ ಜನನಿಯ ತನುಜಾತೆಯನ್ನು ಪಿ.ಬಿ.ಎಸ್. ಬಲು ಮಧುರವಾಗಿ ಹಾಡಿದ್ದಾರೆ. ಜಾನಕಿ ಅವರ ಸಿರಿತನ ಬೇಕೆ ಬಡತನ ಸಾಕೆ ಮತ್ತೊಂದು ಜನಪ್ರಿಯ ಹಾಡು.
ಕಥೆ ಬಹಳವೇ ಪ್ರಸಿದ್ಧ ಥೀಮ್ ಹೊಂದಿದೆ. ಉಳ್ಳವರು ಮತ್ತು ಇಲ್ಲದವರ ನಡುವಿನ ಕಂದಕದ ಬಗೆಗೆ ಈ ಕಥೆ.
ಉಮಾಕಾಂತ್(ಕೆ.ಎಸ್.ಅಶ್ವತ್ಥ್) ಒಳ್ಳೆಯ ಬಿಜಿನೆಸ್‍ಮನ್. ಅವನ ಬಾಸ್ ಅವನನ್ನು ಬಹಳ ಮೆಚ್ಚಿಕೊಂಡಿರುತ್ತಾನೆ. ಆದರೆ ಉಮಾಕಾಂತನ ಪತ್ನಿ ಹೆರಿಗೆಯಲ್ಲಿ ತೀರಿಕೊಂಡಾಗ ಕೆಲಸ ಬಿಡುವೆನೆನ್ನುತ್ತಾನೆ ಉಮಾಕಾಂತ. ಆಗ ಅವನ ಬಾಸ್ ಬಂದು ತನ್ನ ಮಗಳನ್ನು ಮದುವೆಯಾಗು, ಮಗುವನ್ನು ಮಾತ್ರ ಅದರ ಅಜ್ಜನ ಬಳಿ ಬಿಡು ಎನ್ನುತ್ತಾನೆ. ಬಾಸ್‍ನ ಮಗಳು (ಆರ್.ಟಿ.ರಮಾ) ಉಮಾಕಾಂತನ ಕೈ ಹಿಡಿಯುತ್ತಾಳೆ. ಅವಳಿಗೆ ತನ್ನ ಪತಿಗೆ ಒಬ್ಬ ಗತಿಸಿದ ಪತ್ನಿ ಇದ್ದಳೆಂಬ ವಿಷಯ ತಿಳಿಯದು.
ಈ ಮಗು ಶ್ರೀನಾಥ (ರಾಜ್ಕುಮಾರ್) ಬೆಳೆದು ಬೆಂಗಳೂರಿನ ದೇವರಾಜನ (ಉದಯಕುಮಾರ್) ಮನೆಗೆ ಪೇಯಿಂಗ್ ಗೆಸ್ಟ್ ಆಗಿ ಬರುತ್ತಾನೆ. ಅವನ ಹೆಂಡತಿ (ಜಯಶ್ರೀ) ಮತ್ತು ಮಕ್ಕಳು ಸುಮನಾ (ಲೀಲಾವತಿ) ಮತ್ತು ಲೀಲಾ(ಜ್ಯೂ.ರೇವತಿ) ಇವನನ್ನು ಆದರಿಸುತ್ತಾರೆ. ಸುಮನಾ ಜೀವನದಲ್ಲಿನ ಅತಿ ದೊಡ್ಡ ಸುಳ್ಳು ಹೇಳಿ ಶ್ರೀನಾಥನ ಕೈ ಹಿಡಿಯುತ್ತಾಳೆ. ನಂತರ ಕೇವಲ ಬಡವ ಶ್ರೀಮಂತರ ಜಟಾಪಟಿ, ಕೊನೆಯವರೆಗೂ.
ನರಸಿಂಹರಾಜು ಸಮಾಜಸೇವಕನ ಪಾತ್ರದಲ್ಲಿದ್ದಾರೆ. ಪರಸ್ಪರ ಸಹಕಾರ, ಸ್ವಾವಲಂಬನೆ, ಬೇಸಾಯ ಮುಂತಾದ ವಿಷಯಗಳ ಬಗ್ಗೆ ಸರಳವಾಗಿ ಹೇಳಿದ್ದಾರೆ. ಕಥೆ, ಚಿತ್ರಕಥೆ ಮತ್ತು ಎರಡು ಹಾಡುಗಳನ್ನು ಬರೆದು ನಿರ್ದೇಶಿಸಿದ ಕು.ರಾ. ಸೀತಾರಾಮಶಾಸ್ತ್ರಿಯವರು.
ಕೆ.ಎಸ್. ಅಶ್ವತ್ಥ್ ಮತ್ತು ಆರ್. ಟಿ. ರಮಾರ ಪುತ್ರನಾಗಿ ಡಾಕ್ಟರಿಕೆ ಓದುವವನಾಗಿ ಚರಿತ್ರನಟ ಬಾಲಕೃಷ್ಣ ಅಭಿನಯಿಸಿದ್ದಾರೆ. ಅಬ್ಬಾ! ಈ ಸಿನಿಮಾ ಬಂದಾಗ ಅವರಿಗೆ ಐವತ್ತು ವರ್ಷವಿರಬಹುದು. ಸುಮಾರು ಮೂವತ್ತು ವರ್ಷದವನ ಪಾತ್ರದಲ್ಲಿ ಲವಲವಿಕೆಯಿಂದ ನಟಿಸಿದ್ದಾರೆ. ಜ್ಯೂ.ರೇವತಿಯೊಂದಿಗೆ ಲವ್ ಲವ್ ಎಂದರೇನು ಒಲವು ಹಾಡಿಗೆ ಹೆಜ್ಜೆ ಹಾಕಿದ್ದಾರೆ. ಅವರೇ ಬರೆದಿರಬೇಕು ಕೂಡ ಈ ಗೀತೆಯನ್ನು.
