ಚಂದಮಾಮಾ ಕಥೆಗಳಂತೆ ಒಳ್ಳೆಯವರಿಗೆ ಒಳ್ಳೆಯದು ಎನ್ನುವಂತೆ ಮುಗಿಯದ ವಿಶೇಷ ಚಿತ್ರವಿದು. ಕಥೆಯ ಮೂಲ ಜಗಮೆಚ್ಚಿದ ಮಗ ಚಿತ್ರದಂತೆಯೇ. ಅದರಲ್ಲಿ ರಾಜ ತನ್ನ ಹೆಂಡತಿಗೂ, ಮಂತ್ರಿಗೂ ಸಂಬಂಧವಿದೆಯೆಂದು ನಂಬಿ ಹೆಂಡತಿಯನ್ನು ಓಡಿಸುತ್ತಾನೆ.
ಇದರಲ್ಲಿ ಶೇಖರವರ್ಮ (ರಾಜ್ಕುಮಾರ್) ತನ್ನ ಹೆಂಡತಿ ಮಂಗಳಾಗೂ(ಬೆಡಗಿನ ನಟಿ ಭಾರತಿ), ತನ್ನ ಪ್ರಾಣಸ್ನೇಹಿತ ಮಲ್ಲನಿಗೂ (ಉದಯಕುಮಾರ್) ಸಂಬಂಧವಿದೆಯೆಂದು ನಂಬಿ (ಇದು ಮಂತ್ರಿಗಳಿಬ್ಬರ ಕುತಂತ್ರ. ಆದರೆ ಅವರು ಸದುದ್ದೇಶದಿಂದ ಹಾಗೆ ಮಾಡಿರುತ್ತಾರೆ!) ಗರ್ಭಿಣಿ ಹೆಂಡತಿಯನ್ನು ಓಡಿಸಿ, ಮಲ್ಲನಿಗೆ ಕಾರಾಗೃಹವಾಸದ ಶಿಕ್ಷೆ ವಿಧಿಸುತ್ತಾನೆ. ವಿಧಿಯ ಲೀಲೆಯಂತೆ ಮಂಗಳಾ ಮತ್ತು ಮಲ್ಲ ಒಂದೆಡೆ ಸೇರಿ ಶೇಖರವರ್ಮನ ಮಗ ರಾಜನನ್ನು ಬೆಳೆಸುತ್ತಾರೆ.
ಇತ್ತ ಒಂದು ಪ್ರಮೀಳಾ ರಾಜ್ಯವಿರುತ್ತದೆ. ಪಂಕಜವಲ್ಲಿ (ವಂದನಾ) ಅವಳ ರಾಜ್ಯದಲ್ಲಿ ಕೇವಲ ಹೆಣ್ಣುಪಾಳ್ಯ ಇಟ್ಟಿರುವ ರಾಣಿ. ರಮಾದೇವಿ ಅವಳ ಸೇನಾಧಿಪತಿ, ಪಾಪಮ್ಮ ಅವಳ ಮಂತ್ರಿ, ಆರ್.ಟಿ.ರಮಾ ಅವಳ ಸಖಿ. ಈ ಸಖಿ ಕದ್ದು ಮುಚ್ಚಿ ಒಬ್ಬ ಪ್ರಿಯಕರನನ್ನು ಹೊಂದಿರುತ್ತಾಳೆ (ನರಸಿಂಹರಾಜು ಹೆಣ್ಣು ವೇಷದಲ್ಲಿ ಕೆಲವು ಸಮಯ ಕಾಣಿಸಿಕೊಳ್ಳುತ್ತಾರೆ). ವಿಜಯವರ್ಮನೆಂಬ (ಬಾಲಕೃಷ್ಣ) ಮುದಿರಾಜನಿಗೆ ವಂದನಾಳ ಮೇಲೆ ಕಣ್ಣು.
ವಿಧಿಯ ವಿಪರೀತದ ಆಟದಲ್ಲಿ ಶೇಖರವರ್ಮನಿಗೂ, ರಾಜನಿಗೂ ಯುದ್ಧವಾಗಿ… ಶೇಖರವರ್ಮನಿಗೆ ಹೆಂಡತಿಯ ಪಾತಿವ್ರತ್ಯದ ಬಗೆಗೆ ನಂಬಿಕೆ ಬಂದು… ಸಿನಿಮಾ ಮುಗಿಯುತ್ತದೆ.
ಎರಡು ಹಾಡುಗಳು ಸ್ವಲ್ಪ ಪರಿಚಿತ. ‘ಮಣ್ಣು ನೀರು ಗಾಳಿ ಬೆಳಕು’ ಎಂದಾರಂಭವಾಗುವ ಪಿಬಿಎಸ್ ಎಸ್ಜಾನಕಿ ಯುಗಳಗೀತೆ ಮತ್ತು ‘ಮುತ್ತಂಥ ಮಗನಾಗಿ ಹೆತ್ತವಳ ಸಿರಿಯಾಗಿ ದೇವರಿತ್ತ ವರವಾಗಿ ನೀ ಬಾಳೆಲೋ ಕಂದ ನೀ ಬಾಳೆಲೋ’ (ಎಸ್ ಜಾನಕಿ).
ರಾಜ್ ಸ್ತ್ರೀದ್ವೇಷದಿಂದ ಆರಂಭಿಸಿ (ಲಗ್ನಪತ್ರಿಕೆ ನೋಡಿದ ನಂತರ ಮತ್ತೆ ಸ್ತ್ರೀದ್ವೇಷಿ ರಾಜ್!) ಹಳ್ಳಿಯ ಹೆಣ್ಣನ್ನು ಪ್ರೇಮಿಸಿ, ಮದುವೆಯಾಗಿ, ಮಂತ್ರಿಗಳ ಕುತಂತ್ರದಿಂದ ಹೆಂಡತಿಯನ್ನೂ, ಪ್ರಾಣಸ್ನೇಹಿತನನ್ನೂ ಓಡಿಸಿ, ಕೋಪದಿಂದ ಇದ್ದು, ನಂತರ ದುಃಖಿಸಿ, ವಿರಹ ಅನುಭವಿಸಿ, ಮಗನನ್ನು ಕಂಡು ಮಮತೆ ಬಂದು…. ಅನೇಕ ರೀತಿಯ ಭಾವೋದ್ವೇಗಗಳ ಪ್ರದರ್ಶನ ಬಲು ಚೆನ್ನಾಗಿ ಮಾಡಿದ್ದಾರೆ.
ಉದಯಕುಮಾರ್ ನಿಜಕ್ಕೂ ಅದ್ಭುತ ನಟ. ವಂದನಾ ಶೇಖರವರ್ಮನನ್ನು ಪ್ರೇಮಿಸುವ, ನಂತರ ಅವನನ್ನು ದ್ವೇಷಿಸುವ ಪಾತ್ರ ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ಭಾರತಿಯ ವೃದ್ಧತಂದೆಯಾಗಿ ದಿನೇಶ್ ಅಚ್ಚರಿ ಉಂಟುಮಾಡುತ್ತಾರೆ.
1967ರ ಈ ಚಿತ್ರದಲ್ಲೇ ಭಾರತಿ, ಉದಯ್ಕುಮಾರ್, ರಾಜ್ ಎಲ್ಲರೂ ತಲೆಗೆ ಬಿಳಿಬಣ್ಣ ಬಳಿದಿದ್ದಾರೆ ಎನ್ನುವುದು ಗಮನಾರ್ಹ.
