ಕಠಾರಿ ವೀರ

1966ರ ಈ ವೈ ಆರ್ ಸ್ವಾಮಿ ನಿರ್ದೇಶನದ ಚಿತ್ರವು ಚಂದಮಾಮಾ ಕಥೆಯಂತಿದೆ.

ರಾಜನೊಬ್ಬ. ಅವನಿಗೆ ಒಬ್ಬ ರಾಣಿ (ಪಾಪಮ್ಮ). ಒಬ್ಬ ಯವ್ವನವತಿ ಮಗಳು ವಾಸಂತಿ(ಉದಯಚಂದ್ರಿಕಾ) ಮತ್ತು ಒಬ್ಬ ಪುಟ್ಟ ಐದು ವರ್ಷದ ಮಗ. ಅವನಿಗೊಬ್ಬ ಬಲುದುಷ್ಟ ಸೇನಾಧಿಪತಿ ಪ್ರಚಂಡ(ಕಲಾಕೇಸರಿ ಉದಯಕುಮಾರ್… ವಾಹ್… ದುಷ್ಟತನವೇ ಮೂರ್ತಿವೆತ್ತಂತಹ ಪಾತ್ರ. ಕಣ್ಣಿನ ಸುತ್ತಲೂ ಕಾಡಿಗೆ ಹಚ್ಚಿ ಗಹಗಹ ವಿಕಟಾಟ್ಟಹಾಸ ಮಾಡುವ ದುಷ್ಟ). ಅವನಿಗೆ ಒಬ್ಬಳ ಗೆಳತಿ ಕಲಾವತಿ (ವಾಣಿಶ್ರೀ. ಮುಂದೆ ತೆಲುಗಿನಲ್ಲಿ ಪ್ರಸಿದ್ಧಳಾದಾಕೆ. ಅಣ್ಣಾವ್ರಿಗೆ ‘ಕಾಸಿದ್ರೆ ಕೈಲಾಸ’ ಚಿತ್ರದಲ್ಲಿ ನಾಯಕಿ). ಅವಳು ರಾಜನಿಗೆ ವಿಷಪಾನ ಮಾಡಿಸಿ ಭರತನಾಟ್ಯವನ್ನು ಮಾಡುತ್ತಾಳೆ. ಅಧಿಕಾರವನ್ನು ತನ್ನ ಕೈಗೆ ತೆಗೆದುಕೊಳ್ಳುವ ಪತ್ರಕ್ಕೆ ಸಹಿ ಹಾಕುವ ಮುಂಚೆಯೇ ರಾಜ ಸಾಯುತ್ತಾನೆ. ಆ ಕೊಲೆಯ ಆಪಾದನೆಯನ್ನು ಒಳ್ಳೆಯ ಬುದ್ಧಿಯ ಮಂತ್ರಿಯ ಮೇಲೆ ಹಾಕುತ್ತಾನೆ ಪ್ರಚಂಡ. ಅವನಿಗೆ ಕೇಸರಿ (ಬಾಲಕೃಷ್ಣ) ಎಂಬ ಸಹಾಯಕ. ಕೇಸರಿಯ ವೈಯಕ್ತಿಕ ಸಹಾಯಕರಲ್ಲಿ ಒಬ್ಬ ನಾನೇನ್ ಮಾಡ್ಲಿ ಎಂದು ಇಡೀ ಸಿನಿಮಾದಲ್ಲಿ ಕೇಳುವ ಪಾತ್ರ (ರತ್ನಾಕರ).

ವಿಜಯ(ರಾಜ್‍ಕುಮಾರ್) ಕಠಾರಿ ವೀರ. ಸಖತ್ ಕತ್ತಿ ಫೈಟುಗಳನ್ನೂ, ಸೂಪರ್ ಕುದುರೆ ಸವಾರಿಯನ್ನೂ ಮಾಡಿದ್ದಾರೆ ರಾಜ್.

ರಂಗ (ನರಸಿಂಹರಾಜು) ರಾಜ್‍ಗೆ ಸಹಾಯಕ. ಅವನಿಗೊಬ್ಬ ಪ್ರೇಮಿಕೆ. ಆಕೆಯನ್ನು ಕೇಸರಿಯೂ ಪ್ರೇಮಿಸುತ್ತಾನೆ. ಅದೊಂದು ತ್ರಿಕೋನ ಕಥೆ. ನರಸಿಂಹರಾಜುವಿಗೆ ಒಂದು ಡ್ಯೂಯೆಟ್ ಕೂಡ ಇದೆ.

ರಾಜ್ ಲೀಲಾಜಾಲವಾಗಿ ನಟಿಸಿದ್ದಾರೆ. ಗಾಳಿಪಟದಲ್ಲಿ ಕೂತು, ಅದರ ದಾರ ಕತ್ತರಿಸಿ ರಾಜನ ಅರಮನೆಯ ಮೇಲೆ ಇಳಿಯುವ ವಿಶಿಷ್ಟ ಸನ್ನಿವೇಶವಿದೆ ಈ ಚಿತ್ರದಲ್ಲಿ. ಉದಯಚಂದ್ರಿಕ ಹುಡುಗನ ವೇಷದಲ್ಲಿ ಬಂದು, ನಂತರ ಹೆಣ್ಣಾಗಿ ಕಾಣಿಸಿಕೊಳ್ಳುತ್ತಾರೆ.

ಕಿವಿಮಾತೊಂದ ಹೇಳೆ ನಾನೋಡಿ ಬಂದೆ ಎನ್ನುವ ಹಾಡು ಹಿಂದೆ ಕೇಳಿದ್ದ ನೆನಪು. ಎರಡು ನೃತ್ಯಗಳು ವಾಣಿಶ್ರೀಗೆ. ಒಂದು ಭರತನಾಟ್ಯದ ಹಾಡು. ಮತ್ತೊಂದು ಎಲ್ ಆರ್ ಈಶ್ವರಿಯ ಝಣಾ ಝಣಾ ಝಣ್ ಝಣಾ ಎನ್ನುವ ಹಾಡು.

ಅತ್ಯಂತ ಜನಪ್ರಿಯ ಎನ್ನಿಸುವ ಎರಡು ಹಾಡುಗಳೂ ಇವೆ. ಪಿಬಿಎಸ್. ಎಸ್‍ಜಾನಕಿ ಜೋಡಿಯ ‘ಹಾಯಾದ ಈ ಸಂಗಮ ಹೊಸಬಾಳಿನಾ ಆಶಾಸುಮ ಬೆಸೆಯಿತು ನಮ್ಮ ಈ ಪೇಮ’ ಒಂದು ಹಾಡಾದರೆ, ಪಿ.ಸುಶೀಲ ಹಾಡಿರುವ ‘ಛಂಗು ಛಂಗೆಂದು ಹಾರುವಾ ರಂಗು ರಂಗಿನ ಈ ಜಿಂಕೆ’ ಮತ್ತೊಂದು ಹಾಡು.

ಸಂಸಾರದಲ್ಲಿ ಹುಳಿ ಹಿಂಡುವ ಜನರ ಪಾತ್ರಗಳನ್ನು ನೋಡಿದ ನಂತರ ಉದಯಕುಮಾರ್ ದುಷ್ಟತನದ ಪಾತ್ರ ಸೋ ರಿಫ್ರೆಶಿಂಗ್!