ವೀರ ಕೇಸರಿ, ಕನ್ಯಾಧನ, ಜಗನ್ಮೋಹಿನಿ, ಅಗ್ಗಿ ಭರಾಟಾ ಈ ರೀತಿಯ ಪೌರಾಣಿಕ ಅಥವಾ ಜನಪದ ಚಿತ್ರಗಳನ್ನು ನೋಡಿದ ತಕ್ಷಣ ಮೊದಲು ಚಿತ್ರ ಪ್ರೇಮಿಗಳಿಗೆ ಮಾಂತ್ರಿಕ ಚಿತ್ರಗಳ ರಾಜ ಎಂದು ಪ್ರಸಿದ್ಧಿಯನ್ನು ಪಡೆದಿದ್ದ ನಿರ್ದೇಶಕ ಬಿ. ವಿಠ್ಠಲಾಚಾರ್ಯರ ಹೆಸರೇ ನೆನಪಿಗೆ ಬರುತ್ತದೆ. ಅದರಲ್ಲೂ ಆಧುನಿಕ ತಂತ್ರಜ್ಞಾನ ಇರದ ಕಾಲದಲ್ಲಿ ಇವರು ಮಾಂತ್ರಿಕ ಚಿತ್ರಗಳನ್ನು ಚಿತ್ರಿಸುತ್ತಿದ್ದ ರೀತಿಯನ್ನು ವರ್ಣಿಸಲು ಸಾಧ್ಯವಾಗುವುದಿಲ್ಲ.
1920, ಜನೆವರಿ 20 ರಂದು ಉಡುಪಿ ಬಳಿಯ ಉದ್ಯಾವರದಲ್ಲಿ ಮಧ್ಯಮ ವರ್ಗದ ಮಾಧ್ವ ಬ್ರಾಹ್ಮಣ ದಂಪತಿಗೆ ಏಳನೇ ಮಗುವಾಗಿ ಜನಿಸಿದ ಇವರು ಚಿಕ್ಕ ವಯಸ್ಸಿನಿಂದಲೇ ನಾಟಕ, ಬಯಲಾಟ ಮತ್ತು ಯಕ್ಷಗಾನಗಳಲ್ಲಿ ತೀವ್ರ ಆಸಕ್ತಿಯನ್ನು ಹೊಂದಿದ್ದರು. ಇವರ ತಂದೆ ಹೆಸರಾಂತ ಆಯುರ್ವೇದ ವೈದ್ಯರಾಗಿದ್ದರಲ್ಲದೆ ರೋಗಿಗಳಿಗೆ ಉಚಿತವಾಗಿ ಚಿಕಿತ್ಸೆಯನ್ನು ಕೊಡುತ್ತಿದ್ದರು. ಕೇವಲ ಮೂರನೇ ತರಗತಿಯವರೆಗೆ ಮಾತ್ರ ಶಿಕ್ಷಣವನ್ನು ಪಡೆದಿದ್ದ ಇವರು ಚಿಕ್ಕ ವಯಸ್ಸಿನಲ್ಲಿ ತಮ್ಮ ಅದೃಷ್ಟ ಪರೀಕ್ಷೆಗೆ ಮನೆಯನ್ನು ತೊರೆದು ಬಂದು ಹಲವಾರು ಕೆಲಸಗಳನ್ನು ನಿರ್ವಹಿಸುತ್ತ ಬದುಕಿನ ಶಿಕ್ಷಣವನ್ನು ಪಡೆದಿದ್ದರು. ಹಲವಾರು ಕೆಲಸಗಳನ್ನು ನಿರ್ವಹಿಸಿ ಅಪಾರ ಅನುಭವವನ್ನು ಪಡೆದಿದ್ದ ಇವರು ತಮ್ಮ ಸಂಬಂಧಿಕನಿಂದ ಉಡುಪಿ ಹೋಟೆಲ್ ನ್ನು ಖರೀದಿಸಿ ಯಶಸ್ವಿಯಾಗಿ ಮುನ್ನಡೆಸಿದ್ದರು.
ಇದೇ ಸಮಯದಲ್ಲಿ ನಮ್ಮ ದೇಶದಲ್ಲಿ ಬ್ರಿಟೀಷ್ ಸರ್ಕಾರದ ವಿರುದ್ಧ ಭಾರತ ಬಿಟ್ಟು ತೊಲಗಿ ಚಳುವಳಿಯು ನಡೆದಿತ್ತು. ತಮ್ಮ ಸ್ನೇಹಿತರೊಡನೆ ಈ ಚಳುವಳಿಯಲ್ಲಿ ಭಾಗವಹಿಸಿದ ಪರಿಣಾಮ ಬ್ರಿಟಿಷ್ ಸರ್ಕಾರ ಇವರನ್ನು ಬಂಧಿಸಿತ್ತು. ಆದರೆ ಜೈಲಿನಿಂದ ಹೊರಬಂದ ನಂತರ ಇವರು ತಮ್ಮ ಹೋಟೆಲ್ ಉದ್ಯಮವನ್ನು ಕಿರಿಯ ಸಹೋದರನಿಗೆ ಹಸ್ತಾಂತರಿಸಿ ಆಪ್ತ ಸ್ನೇಹಿತ ಡಿ.ಶಂಕರ್ ಸಿಂಗ್ ಮತ್ತು ಗೆಳೆಯರ ಜೊತೆ ಹಾಸನ ಜಿಲ್ಲೆಗೆ ಆಗಮಿಸಿ ಅಲ್ಲಿಯೇ ಒಂದು ಟೂರಿಂಗ್ ಟಾಕೀಸ್ ನ್ನು ಸ್ಥಾಪಿಸಿದ್ದರು. ಅಷ್ಟೇ ಅಲ್ಲದೆ ಒಂದು ಟೂರಿಂಗ್ ಟಾಕೀಸ್ ನ್ನು ನಾಲ್ಕು ಆಗಿ ಬೆಳೆಸಿದ್ದರಲ್ಲದೆ ಪ್ರದರ್ಶಿಸಲ್ಪಡುತ್ತಿದ್ದ ಪ್ರತಿ ಚಿತ್ರವನ್ನು ನೋಡಿ ಗಮನಿಸಿ ಚಿತ್ರಗಳ ತಯಾರಿಕೆಯ ಪ್ರತಿ ತಂತ್ರವನ್ನು ಕಲಿತುಕೊಂಡಿದ್ದರಲ್ಲದೆ ಇದೇ ಸಮಯದಲ್ಲಿ 1944 ರಲ್ಲಿ ತಮ್ಮ 24 ನೇ ವಯಸ್ಸಿನಲ್ಲಿ ಕೆ.ಆರ್.ಪೇಟೆಯ ರಾಮದಾಸ ಆಚಾರ್ಯರ ಮೂರನೇ ಮಗಳಾದ ಜಯಲಕ್ಷ್ಮಿಯನ್ನು ವಿವಾಹವಾದರು. ಇದೇ ಗೆಳೆಯರೊಂದಿಗೆ ಮೈಸೂರಿಗೆ ತೆರಳಿ ಅಲ್ಲಿಯೇ ಮಹಾತ್ಮ ಪಿಕ್ಚರ್ಸ್ ಹೆಸರಿನಲ್ಲಿ ಚಿತ್ರ ನಿರ್ಮಾಣ ಕಂಪನಿಯನ್ನು ಸ್ಥಾಪಿಸಿದ್ದರು.
ಇಲ್ಲಿ ಆರಂಭವಾದ ಇವರ ಮೋಡಿಯ ಪರಿಣಾಮ 1944 ರಿಂದ 1953 ರ ಒಂಬತ್ತು ವರ್ಷಗಳ ಅವಧಿಯಲ್ಲಿ 18 ಕನ್ನಡ ಚಿತ್ರಗಳನ್ನು ನಿರ್ಮಿಸಿದ್ದರು. ಪ್ರತಿ ಚಿತ್ರದಲ್ಲಿಯು ದೊರಕಿದ ಯಶಸ್ಸು ಅದರಲ್ಲೂ ನಾಗಕನ್ಯಾ, ಶ್ರೀನಿವಾಸ ಕಲ್ಯಾಣ ಚಿತ್ರದ ಯಶಸ್ಸನ್ನು ವರ್ಣಿಸಲು ಪದಗಳೇ ಸಾಲುವುದಿಲ್ಲ. ಆಧುನಿಕ ತಂತ್ರಜ್ಞಾನದ ಯಾವುದೇ ಸೌಲಭ್ಯವೇ ಇರದ ಕಾಲದಲ್ಲಿ ಇವರು ಮಾಂತ್ರಿಕ ಚಿತ್ರಗಳನ್ನು ಚಿತ್ರಿಸುತ್ತಿದ್ದ ರೀತಿ ಎಂತಹವರಿಗಾದರೂ ಬೆರಗು ಮೂಡಿಸುತ್ತದೆ. ಇದ್ದಕ್ಕಿದ್ದಂತೆ ಮಾಯವಾಗುವ ದೃಶ್ಯ, ಆಕಾಶದಲ್ಲಿ ಸಂಚರಿಸುವ ದೃಶ್ಯ, ರುಂಡಗಳ ಚಲನೆಯ ದೃಶ್ಯ, ಇದ್ದಕ್ಕಿದ್ದಂತೆ ಪ್ರತ್ಯಕ್ಷವಾಗುವ ದೇವರು, ಅಬ್ಬರಿಸುವ ದೈತ್ಯರು ಇತ್ಯಾದಿ ಈ ರೀತಿಯ ದೃಶ್ಯಗಳು ಆಗಿನ ಕಾಲದ ಪ್ರೇಕ್ಷಕರಿಗೆ ಹೊಸ ಅನುಭವವನ್ನು ನೀಡುತ್ತಿತ್ತು. ಅಲ್ಲದೇ ಚಿಕ್ಕ ಮಕ್ಕಳು ಭಯ ಪಟ್ಟಂತಹ ಸಂಗತಿಗಳು ಕೂಡ ಇದ್ದವು. ಈ ರೀತಿ ತಮ್ಮ ಚತುರತೆಯಿಂದ ಆ ಕಾಲದಲ್ಲಿ ಕನ್ನಡ ಚಿತ್ರರಂಗದಲ್ಲಿ ಒಂದು ಹೊಸ ಸಂಚಲನವನ್ನು ಸೃಷ್ಟಿಸಿದ್ದರು.
ಆದರೆ 1953 ರಲ್ಲಿ ಒಂದು ಕೆಟ್ಟ ಸಂದರ್ಭದಲ್ಲಿ ತಮ್ಮ ಸ್ನೇಹಿತರ ನಡುವೆ ಉಂಟಾದ ಭಿನ್ನಾಭಿಪ್ರಾಯದಿಂದ ಇವರು ಮಹಾತ್ಮ ಪಿಕ್ಚರ್ಸ್ ನಿಂದ ಹೊರಗೆ ಬಂದು ತಮ್ಮದೇ ವಿಠಲ್ ಪ್ರೊಡಕ್ಷನ್ ಎಂಬ ಕಂಪನಿಯನ್ನು ಸ್ಥಾಪಿಸಿ ರಾಜ್ಯ ಲಕ್ಷ್ಮಿ ಎಂಬ ಚಿತ್ರವನ್ನು ನಿರ್ದೇಶಿಸಿದ್ದರು.
1954 ರಲ್ಲಿ ವಿಭಿನ್ನ ಕಥೆಯನ್ನು ಹೊಂದಿದ್ದ ಕನ್ಯಾಧನ ಎಂಬ ಚಿತ್ರವನ್ನು ನಿರ್ಮಿಸಿ ನಿರ್ದೇಶಿಸಿದ್ದರು. ಈ ಚಿತ್ರವು ತೆರೆ ಕಂಡ ನಂತರ ಒಂದು ಕ್ರಾಂತಿಯನ್ನು ಹುಟ್ಟಿಸಿತಲ್ಲದೆ ಭರ್ಜರಿ ಯಶಸ್ಸನ್ನು ಪಡೆದಿತ್ತು. ಅಲ್ಲದೇ ಈ ಚಿತ್ರವನ್ನು ತೆಲುಗು ಭಾಷೆಯಲ್ಲಿ ರಿಮೇಕ್ ಮಾಡಲು ನಿರ್ಧರಿಸಿ ಮದ್ರಾಸ್ ಗೆ ಪ್ರಯಾಣವನ್ನು ಬೆಳೆಸಿ ಅಲ್ಲಿಯೇ ತಮ್ಮ ವಾಸ್ತವ್ಯವನ್ನು ಹೂಡಿದ್ದರು. ಇವರು ಮದ್ರಾಸ್ ಪ್ರವೇಶಿಸಿದ ಸಮಯದಲ್ಲಿ ಆಗ ತಾನೇ ತೆಲುಗು ಚಿತ್ರರಂಗವನ್ನು ಪ್ರವೇಶಿಸಿದ್ದ ಹಿರಿಯ ನಟ ಎನ್.ಟಿ.ಆರ್ ನಟಿಸಿದ್ದ ಇಂಗ್ಲೀಷ್ ಅನುವಾದ ಫ್ಯಾಂಟಸಿ ಕಥೆಯನ್ನು ಹೊಂದಿದ್ದ ಪಾತಾಳ ಭೈರವಿ ಚಿತ್ರವು ತೆರೆ ಕಂಡು ಯಶಸ್ವಿ ಪ್ರದರ್ಶನವನ್ನು ಕಾಣುತ್ತಿತ್ತು. ನಂತರ ನಮ್ಮ ಕನ್ನಡಿಗರ ಕಣ್ಮಣಿ ನಟ ಸಾರ್ವಭೌಮ ಡಾ.ರಾಜಕುಮಾರ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ ವೀರ ಕೇಸರಿ ಎಂಬ ಚಿತ್ರವನ್ನು ತಯಾರಿಸಿ ಬಿಡುಗಡೆ ಮಾಡಿದ್ದರಲ್ಲದೆ ನಂತರ ಕಂಡ ಯಶಸ್ಸು ಸಾಮಾನ್ಯವಾಗಿರಲಿಲ್ಲ. ಮತ್ತು ತೆಲುಗು ಚಿತ್ರರಂಗದ ಹಿರಿಯ ನಟ ಎನ್.ಟಿ.ಆರ್ ಜೊತೆ ಅಗ್ಗಿ ಭರಾಟಾ, ಗಂಡಿ ಕೋಟ ರಹಸ್ಯಂ, ಲಕ್ಷ್ಮಿ ಕಟಾಕ್ಷ, ಪಿಡುಗು ರಾಮುಡು, ನಿನ್ನೆ ಪೆಳ್ಳಾಡುತ ಮತ್ತು ಗುಂಡಮ್ಮ ಕಥಾ ಸೇರಿ 15 ಚಿತ್ರಗಳಲ್ಲಿ ಕೆಲಸವನ್ನು ನಿರ್ವಹಿಸಿದ್ದ ಇವರು ಸೂಪರ್ ಸ್ಟಾರ್ ಕೃಷ್ಣ ಜೊತೆ ಮೋಸಗಾಳಕು ಮೋಸಗಾಡು ಚಿತ್ರದಲ್ಲಿ ಕೂಡ ಕೆಲಸವನ್ನು ನಿರ್ವಹಿಸಿದ್ದಾರೆ. ಅಷ್ಟೇ ಅಲ್ಲದೆ ಇವರು ನಟ ಜೆಮಿನಿ ಗಣೇಶನ್ ಮತ್ತು ನಟಿ ಎಂ.ಎನ್. ರಾಜಮ್ಮ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ ಪೆನ್ನು ಕುಲತಿನ್ ಮೊನ್ವಿಲಕ್ಕು ಎಂಬ ತಮಿಳು ಚಿತ್ರವನ್ನು ನಿರ್ದೇಶಿಸುವ ಮೂಲಕ ತಮ್ಮ ಪ್ರತಿಭೆಯನ್ನು ತಮಿಳು ಚಿತ್ರರಂಗದಲ್ಲಿ ಕೂಡ ಸಾಬೀತು ಪಡಿಸಿದ್ದರು. ಆದರೆ ಗಮನಿಸಬೇಕಾದ ವಿಷಯವೇನೆಂದರೆ ಇವರು ನಿರ್ದೇಶಿಸಿದ ಮತ್ತು ನಿರ್ಮಿಸಿದ ಚಿತ್ರಗಳು ಗಲ್ಲಾಪೆಟ್ಟಿಗೆಯಲ್ಲಿ ಉತ್ತಮ ಗಳಿಕೆಯನ್ನು ಕಂಡಿದ್ದರೂ ಒಂದೇ ಒಂದು ಪ್ರಶಸ್ತಿಯನ್ನು ಪಡೆಯದೇ ಇರುವುದು ಆಶ್ಚರ್ಯಕರ ಸಂಗತಿಯೂ ಆಗಿದೆ. ಇಂತಹ ಅಗಾಧವಾದ ಪ್ರತಿಭೆಯನ್ನು ಹೊಂದಿದ್ದ ಇವರು ಚೆನ್ನೈನಲ್ಲಿ ಮೇ 28, 1999 ರಂದು ತಮ್ಮ 79 ನೇ ವಯಸ್ಸಿನಲ್ಲಿ ಮರಣಹೊಂದಿದರು.
ಆದರೆ ಚಿತ್ರ ಪ್ರೇಮಿಗಳು ನೀಡಿದ ಬಿರುದುಗಳು ಈ ರೀತಿಯಾಗಿವೆ
1) ಕನ್ನಡ ಚಿತ್ರರಂಗ ಕಂಡ ಮಾಂತ್ರಿಕ ಚಿತ್ರಗಳ ರಾಜ
2) ತೆಲುಗು ಚಿತ್ರರಂಗ ಕಂಡ ಜನಪದ ಬ್ರಹ್ಮ
3) ತಮಿಳು ಚಿತ್ರರಂಗ ಕಂಡ ಮಾಯಾಜಾಲಾ ಮನ್ನನ್
ಈ ರೀತಿಯಾಗಿ ಬಿರುದುಗಳು ದೊರೆಯುವುದು ಅಪರೂಪವೇ ಆದರೂ, ಅದರಲ್ಲೂ ಕನ್ನಡಿಗನಿಗೆ ದೊರಕಿರುವುದು ಕನ್ನಡಿಗರ ಆದ ನಮಗೆ ಹೆಮ್ಮೆಯ ಸಂಗತಿಯಾಗಿದೆ.
(ದೊರೆತ ಅಲ್ಪ ಮಾಹಿತಿ ಆಧರಿಸಿ ಈ ಲೇಖನವನ್ನು ರಚಿಸಿದ್ದೇನೆ).
