ಬಡವ ಶ್ರೀಮಂತರ ನಡುವಣ ಕಂದಕದ ಈ ಕಥೆಯ ಕರ್ತೃ ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಶ್ರೀ ಸಿ.ಎನ್. ಅಣ್ಣಾದೊರೆ ಅವರು!
ಬಡವರ ರಕ್ತ ಹೀರುವ ಸಾಹುಕಾರ. ಅವನ ಬಡ್ಡಿ ವಸೂಲಿಯ ತರೀಕಾಗಳನ್ನು ತಡೆಯಲಾರದೇ ಆತ್ಮಹತ್ಯೆ ಮಾಡಿಕೊಂಡವರಲ್ಲಿ ಆನಂದನ ತಂದೆಯೂ ಒಬ್ಬ. ಅಪ್ಪನ ಸಾಲ ತೀರಿಸಲು ಹಣದೊಂದಿಗೆ ಓಡಿ ಬಂದ ಆನಂದನಿಗೆ ಕಂಡದ್ದು ಅವನ ತಂದೆಯ ಶವ. ನೇಣಿಗೆ ಶರಣಾಗಿರುತ್ತಾನೆ ಆತ.
ಸಿಟ್ಟಿನಿಂದ ಸಾಹುಕಾರನನ್ನು ಕೊಲ್ಲಲು ಹೋದಾಗ ಅವನಿಗೆ ಎದುರಾಗುವವನು ಗೋವಿಂದ. ಅವರಿಬ್ಬರಿಗೂ ಒಂದು ಹೆಣ ಸಿಗುತ್ತದೆ. ಅದು ಥೇಟ್ ಆನಂದನಂತೆಯೇ ಇರುವ ಪರಮಾನಂದನದು.
ಸಾಹುಕಾರನ ಮಗಳು ಸರಸಾ ಮಹಾ ಅಹಂಕಾರಿ. ಮಗ ಶಂಕರ ತನ್ನ ಮನೆಯ ಕೆಲಸದಾಕೆ ಮಲ್ಲಿಯನ್ನು ಪ್ರೀತಿಸುತ್ತಾನೆ. ಸರಸಾಳ ದುರ್ನಡತೆಗೆ ಸದಾ ಬಲಿಯಾಗುವವಳು ಮಲ್ಲಿ. ಸಾಹುಕಾರನ ಸಹಾಯಕ ತಿರುಪತಿ ಒನ್ ಲೈನರ್‍ಗಳನ್ನು ಹೊಡೆಯುವುದು ಮಜಾ ಕೊಡುತ್ತದೆ.
ಕಥೆ ಅಲ್ಲಿ ಇಲ್ಲಿ ಸುತ್ತಿ ಕೊನೆಗೆ ಶುಭಂ.
ಆನಂದನಾಗಿ ರಾಜ್‍ಕುಮಾರ್ ದುಷ್ಟ ಪತಿಯಾಗಿ ಪತ್ನಿಯನ್ನು ಗೋಳು ಹುಯ್ದುಕೊಳ್ಳುತ್ತಾರೆ. ದುಷ್ಟ ಸಾಹುಕಾರನ ಮಗಳು ಸರಸಾಳನ್ನೇ ಮದುವೆಯಾಗಿ ಅವಳಿಗೆ ಬುದ್ಧಿ ಕಲಿಸುವ ಪಾತ್ರ. ಉದಯಕುಮಾರ್ ಈ ನಾಟಕದ ಸೂತ್ರಧಾರಿ ಗೋವಿಂದನಾಗಿ ನಟಿಸಿದ್ದಾರೆ. ಬಾಲಕೃಷ್ಣ ಧರಿಸುವಂತಹ ದುಷ್ಟ ಸಾಹುಕಾರನ ಪಾತ್ರ ಇಲ್ಲಿ ಮಾಡಿರುವುದು ಕೆ.ಎಸ್.ಅಶ್ವತ್ಥ್. ರಾಜಾಶಂಕರ್ ಶಂಕರನಾಗಿ, ಸಾಹುಕಾರ್ ಜಾನಕಿ ಸರಸಾಳಾಗಿ, ಲೀಲಾವತಿ ಮಲ್ಲಿಯಾಗಿ ನಟಿಸಿದ್ದಾರೆ. ತಿರುಪತಿಯಾಗಿ ನರಸಿಂಹರಾಜು.
ಪಿ.ಸುಶೀಲ ಪಿಬಿಎಸ್ ‘ಒಲವಂತೆ ಗೆಲುವಂತೆ’ ರಾಜಾಶಂಕರ್, ಲೀಲಾವತಿಗೆ, ‘ಆಡೋಣ ಬಾ ಬಾ ಗೋಪಾಲ’ ಎಸ್. ಜಾನಕಿ ಹಾಡು ಸಾಹುಕಾರ್ ಜಾನಕಿಗೆ, ‘ಮದುವೆ ಎಂಬ ಸಂತೆಗೆ ಮಾರಲೆಂದು ಮೆಲ್ಲಗೆ’ ಪಿ. ಸುಶೀಲ ಲೀಲಾವತಿಗೆ ಹಾಡಿದ್ದಾರೆ. ಉಳಿದ ಐದು ಹಾಡುಗಳು ಅಷ್ಟು ಕೇಳಿಲ್ಲ ನಾನು. ನನ್ನ ನಿನ್ನ ಸಲ್ಲಾಪವೆಲ್ಲ, ಮಹಾಪುರುಷರೆ ಪ್ರೇರಕ ಶಕ್ತಿ ಎರಡೂ ಎಸ್ ಜಾನಕಿ. ನಿನ್ನಾ ಸೇರಿದಾಗ ಹಾಡು ಪಿ.ಸುಶೀಲ ಮತ್ತು ಪಿಬಿಎಸ್.
ಕುಡಿದು ತೂರಾಡುತ್ತಾ ರಾಜ್, ಉದಯ್ ಜಿಕೆವೆಂಕಟೇಶ್ ಮತ್ತು ಪಿಬಿಎಸ್ ಧ್ವನಿಗಳಲ್ಲಿ ನಗುವೇ ನಾಕ ಅಳುವೇ ನರಕ ಒಂದು ರೀತಿ ಚೆನ್ನಾಗಿದೆ.
